Minuccia
Scritto da Nino Vicidomini   
MINUCCIA

Minuccia s’arrangiava ogni staggiòne
vennenno chelli ccose sfiziùselle
c’ ‘a ppoche lire tu putiv’avè’.

Venneva: franfellìcche, bomboloni,
’e ppalle ‘e salamone,
’e vvarchetèlle e ‘e lacce ‘e dionizio,
’e diavulille, ’e zzare, ’e cannelline,
’e ppùglie ’e ciucculata, ’e sciusciù…

‘E ppazzielle!..
Scuppètte, cavallùcce, seggiulélle,
’e lléngue ‘e menelìcche, ’e ppupatèlle,
cumète, cumetùne, trumbettèlle,
’e stelletelle, ‘e ccarte pe’ghiucà’.

Venneva: sciosciamòsche, scupettine,
ventaglie, carusiélle, ciappettine,
aco, cuttone, spingule, frummelle,
scupètte, pettenésse,crumatine,
spiccecatùre,’o scisto, ‘o ddidditti.

Naffttalìna, ‘o ‘nciénzo, ‘a bbrillantìna,
soda, liscìa e ‘o ssapone ‘e piazza,
pèttene stritte, aco saccuràle,
pastùre p’ ‘o presèbbio e  ‘a céralacca,
‘o ggesso p’ ‘a lavagna, pennine e cartazùca,
gomme pe’ cancellà’…

Sempe appicciata chella furnacèlla:
cu’ ‘e ffave cotte, cu’ ‘e ccastagne allèsse,
pigne arrustute, uòrgio abbrustulùto,
’e ccauràre chien’ ‘e pullanchèlle.

Me n’aggio accumpagnate marennèlle!
…E me n’aggio zucato turz’ ‘e spiche,
rattàte ‘e neva càrreche ‘e culùre,
prunèlle verde, lazzaròle, cèveze!..

Cuntròre sane a rompere pignuòle,
noce e nucelle fresche;
a sfrantummà castagne sott’ ‘e riente,
chelli spezzate, e vrangh’ ‘e spassatiémpo…  

Minuccia, cu’ cinche lire te levava ‘a famma.

Minuccia… E comme faje a t’ ‘a scurdà’?!..